والله خسارة فيكم الخير

[محمد2050]

السلام عليكم

بصراحة بصراحة
خسارة فيكم الخير وخسارة فيكم اي حاجه كويسة

لانه الواحد بعمللكم الي بدكم اياه وياريت عاجبكم

قلتو بدنا دورة زفت فوتوشوب
وقلبتو الدنيا
قلنالكم طيب وراموستا تكفل بالموضوع
وزهق وهو يعمل شروح وينزلها ومحدش فيكم مدور ..

يا دوب بلاقي رد او تنين عالموضوع


بعدها بفترة اجا محمد اسعد وعرض فكرة دورة الفيجوال بيسك
ومليتو 3 صفحات وانتو تحكو بدنا الدورة ومشتركين

ولما بدا بالدورة محدش فيكم دور عليها

والمواضيع الي بنزلها ولا حدا بطلع عليها ولا برد ولو بالكزب


ومن فترة التنين حكو معي وحكولي خلص ما بدنا نكمل لانه بنشرح وما حدا مدور

قلت بعقلي بدي انشط القسمين وحطيتهم بواجهه المنتدى بكل الصفحات علشان الكل يشوفهم
وبردو لا سبيل

عموما من اليوم فش دورات ولا زفت

لانه خسارة فيكم

عارف مش رح يعجبكم كلامي ،، لانه كلمة الحق بتزعل ..

عموما الي بده يزعل ، يشرب البحر ..

وتصبحو على خير ..

[الامبراطور 22]

هادا اكتر عيب بالمنتدى عنا


انا اولهم بحكاية دورة الفوتوشوب اما البيسك لا ما بدى اياها

عادة المنتدى تاعنا تاع حكى بس

[كفورية بحدود]

اللي بيعرف بيعرف واللي مابيعرف بيقول خسارة فينا :(

اول وحدة صفيت بدي اخد دورة الفوتوشوب (بس البيسك مش كتير لانو يعني مش هاستفيد منها غير للمعرفة)
ومن لما نزل اعلان الدورة وانا بدي انزل البرنامج بس كل مايتنزل عندي مابيشتغل وبتتطلعلي رسالة بالانجلش بتفرسني بقلبي
تخلف


بقى لايش اتابع وانفرس اكتر من هيك


وعلى العموم هي المواضيع موجودة بالنسبة للدورتين
وبالنسبة الي بمجرد ماانزل البرنامج راح امسك موضوع موضوع واطبقو ولو مافهمت شغلة راح استفسر عنها

:)


روق مدير:)

[دمعة تائبة]

كل كلمة حكيتها معك حق فيها .
انا اللي طلبت دورة الفوتوشوب وتابعت بالأول بحماس وكنت أنزل وأضع كل شي
لكن انا بشتغل ع اصدار تاني الامور صعبت شوية عليا فاضريت أنسحب لحتى ما أغلبه
غير هيك ممنوع انو انزل اصدار تاني وما حبيت احكي هالشي بس هيني حكيته ..
لكن رغم هيك اعتذرت لراموستا عن اكمالي الدورة .. وهاد كان ردي :
في البداية يعطيك العافية

الدرس الخامس والسادس نزلته بس ما تابعته ولا عملته لهيك بعتذر
وبعتذر عن الاستمرار في الدورة لاسباب
تقبل مروري
بار ك الله فيك ويعطيك العافية


أما بالنسبة لدورة الفيجول فماسجلت فيها أصلا ..
بالرغم من هالمبررات بحكي انو أكيد هاد اكبر عيب بمنتدانا وانو عنجد ما عرفنا قيمة يلي بيتعبوا عشانا
والله لوما الظروف كنت ما تركتهااا
أكيد كل اللي بيعملوه في ميزان حسناتهم وربنا يوفقهم يارب

[بياض الثلج]

صح كلامك والله يا محمد

كلنا تشجعنا بالاول وبدنا ناخدها ولما بدأ الشرح تراجعنا وبطّل حد مدور

المشرفين والله حرام ماقصروا بالمررررررة بس العيب فينا ومنا احنا

بالنسبة الي انا كنت حابة اخدها بس البرنامج عندي ما بقدر افتحه لانه اخوية عنده شغله الخاص عليه ولو غيرت حاجة بالادوات او غيرها زي ما عامل ما بخلص

المهم المختصر انه العيب منا احنا مش منك ولا من المشرفين

[غزالة]

صراحة،،، شغلة منيحة قرارك!

[محمد2050]

بس 5 ردود ؟؟

انا بعرف اخليهم يدخلو بالغصب هلأ ..

راجعلكم ..

[sunlight]

روق اخى و مشكور ع جهدك

[~* ضوء القمر *~]

وانا كمان سجلت بدورة الفوتوشوب

وكنت افوت على المواضيع اللي كان ينزلها

بس لما بدا شرح اللي كان يحكيه كان سهل كتير وعارفاه

كنت باستنى بالدروة بس يتقدمو فيها شوي

بس بصراحة حتى لو كان هيك كان لازم نشارك ونشكره على تعبه

[wmno]

بس 5 ردود ؟؟

انا بعرف اخليهم يدخلو بالغصب هلأ ..

راجعلكم ..


الله يهديك يا شيخ

الواحد فايت ع بكرة الصبح الا والمدير بدو اياك تشوف هالموضوع قبل لتدخل
ايش القصة ايش في

ههههههههههههههههه خسارة فيكم هالخبر >>>> يا عمي الدنيا الصبح

بعدين بالنسبة للدورات المفروض انتا توقعت هالشي من واقع درايتك بأعضائك

ويا سيدي من باب الحفاظ على عمل متكامل فيك تكمل الدورة وتخليها إكيد فايدتها ما بتنحصر بكم الردود الي عليها لأنها حتبقى على طول مدى فاعلية الروابط أو الصور الخاصة بالشرح

وبالنسبة لكلمة الشكر لساتك يخو بتقول الحسنات عند الله والثواب منو

وبرضو روق :)

[فتى المستحيل]

الله يعينك يا محمد بالنسبة لدورة الفوتوشوب بصراحة أنا كنت أحد اللى حبو يشاركوا فيها لكني لقيت العمل اللى بينعمل مش سهل كتير بالإضافة لإنشغالي بدورات خارجية إضطريت فيها إني أسيب الجهاز كلو أصلاً فما قدرت أتابع بس دورة البيسك أصلاً ما سجلت فيها لأني عرفت إني مش حقدر أتابعها من الأول لكني بصراحة شفت إنك تسرعت فقبولها قبل ما تشوف نتائج الدورة الأولى

واولاً وأخيراً ربنا يعينك عالخير وعادارة المنتدى

[كفورية بحدود]

مدير كلام الاخ ويمنو مزبوط

يعني هلأ انا لو وحدة ماليش علاقة بالمنتدى وبدي اتعلم على البرنامجين وعملت بحث على جوجل واجتلها صفحة المنتدى
تخيل قديش هأستفيد منو



يعني احنا خسارة فينا :(

بس في غيرنا راح تكسبو فيهم اجر :)

ولا شو رايك؟

[بيسان]

بسيطة بسيطة

الغي الدورات عشان الكل يعرف قيمتها هههههه

انا من الاول ما اشتركت ولا بوحدة وبدك الصراحة اعضاء منتدانا كانو بموضوع عام يعني زي نشرة الاخبار يا دوب 6 ولا 7 يردو كيف لو كان موضوع بيسك ولا فوتوشوب

مشكور على اهتمامك

[ساهر]

معك حق يا محمد بكلامك ..

بالنسبة الي انا سجلت بدورة الفوتوشوب ونزلت عندي البرنامج عالجهاز ولكن ما كنت افوت عالدورة لانو كان جهازي عطلان باخر فترة وما كنت متابع الموضوع ... يادوب كنت افوت واتابع القسم الي انا مشرف عليه .. اما دورة الفيجول بيسك انا ما سجلت فيها ... واكيد المشرفين علي الدورات ما قصروا ويعطيهم العافية ..

يعطيك العافية يا محمد عالمتابعة والمجهود

[Trust]

بس 5 ردود ؟؟
انا بعرف اخليهم يدخلو بالغصب هلأ ..

بصراحة انت مو من حقك تجبرنا نفوت على هيك موضوع ,انت اجبر يلي قالوا بدهم دورات .
انا كعضوة بالمنتدى وفي غيري كتير كمان لا قلنا بدنا دورات ولا اشتركنا فيهم .
فيعني مو لازم نرد على هالموضوع لانو ما بيعنيلنا .

[توتر السطح]

يا ستّار يا رب !
شو اللي صاير؟؟

صح ! خســـــارة فينا الخير:(
بالنسبة إلي أنا ما سجلت بالدورتين لأني عارفة نفسي ما إلي طولة بال أتعلم عليهم ومش محتاجاهم كتير .
المشرفين ما قصروا أبداً بالعكس كانوا في قمة النشاط والحيوية ، لكن إحنا العكس .
أنا عن نفسي آسفة جداً ،! :(
أكيد لو أنا اللي بنزل الشرح وما بيلاقي تفاعل راح أزعل كتير.
سامحونا على التقصير المدير والمشرفيْن .

[ام صهيب2]

وحد الله يا ابن الحلال ما تقولش هيك والله اعضاء المنتدى زي الاخوات ومثل الاسرة الوحدة ومش مستاهل كل هالزعل على شان موضوع او موضوعين.واذا قصرنا معكم حقكم على راسنا بس بالنسبة الى انا عضوة جديدة وانا اخدت دورة فوتوشوب قبل هيك..
هدي ووحد الله وصلي عالنبي والقصة كلها مش مستاهلة..
اختكم ايمــــــــــان..
تقبل مروري

[حازم حازم]

و الله المدير شكلو مشكلنجي و بدو يشربكو البحر كمان ( عمار يا ليبيا )

[همسة احساس]

فعلاً شئ بنرفز لو أنا لطخيتهم كلهم
هو الواحد بتعب على الفاضي بس
الحمد لله إني مش مشاركة فيهم

[امير الجنوب]

بجد خسارة فينا...


هي هاد الحقيقة ..

نزلك موضوع هبل شوف اكم من واحد يرد ويشارك ويتابع..


مشكور محمد على هذا الاهتمام ...

[مسك الجنة]

روء روء عموووو
مع احترامى كل هالدورات ما بتفووووووت عقلى

[لولو2009]

يعني والي مش مسجل بالدورة واصلا ما بيعرف شي عنها شو زنبه يتبهدل

[بنت جامعة الأقصى]

ومن لما نزل اعلان الدورة وانا بدي انزل البرنامج بس كل مايتنزل عندي مابيشتغل وبتتطلعلي رسالة بالانجلش بتفرسني بقلبي
تخلف


بقى لايش اتابع وانفرس اكتر من هيك


وأنا متلك حاولت ما عرفت وكانت تظهرلي رسالة بالانجلش
سامحنا أخي الكريم محمد2050 صحيح احنا مقصرين
بحق المنتدى والمشرفين الي تعبوا في الدورات
وبنتشكرهم على مجهودهم
بجد هادا مش منتدى بس للحكي واللعب
والله بنستفيد منه بأشياء كتير وهو المنتدى الوحيد الي حبيته
ومسجلة فيه
الواحد بتعلم

[عنيدة في زمن التحدي]

ههههههههههههههههه
انا ما طلبت دورات ولا شي الحمدلله
بس هدي يا عمو مو مستاهلة يلي بدو يشوف هو حر بس بردوا يلى طلبوا الدورات لي ما يتابعوها

[غلآ]

اممممممممم مآ ادري وشو اقول



بسسس شكلووا معصب ياويلي خلوني القط الفيس احسن لي هههههههه

[محمود إسماعيل]

انا سجلت بكلا الدورتين
دورة الفوتوشوب ما كنت منزل البرنامج في هالوقت هاداك , و بعدين بالنسبة للوقت كان بالبداية فقلت لنفسي بدي ابدأ لما أخلص امتحانات اتابع الدورة من اولها ..
لما خلصت امتحانات بديت اطلع ع الدورة و نزلت البرنامج بس بدون تنصيب , و كان بدي استفسر عن كيفية الكتابة لانها مش زابطة معي , بدل ما بيطلع كلمة مشبكة بيطلع حرف حرف و بالشقلوب كمان ..
رحت أكتب رد لقيت الموضوع مغلق ..

كنت حابب أتابع , بس لما شفت كل درس مغلق , حكيت لنفسي الدورة هاي للي متابعين و لهيك ما كملت ..

بس بصراحة عامل جهد كتير كويس راموستا بهاي الدورة ..




بالنسبة لدورة الفيجول بيسك , كنت حابب أكمل فيها و نزلت البرنامج و نصبته على جهازي ..
لكن المشكلة و هاي من وجهة نظري الدورة بتنفع بس للطلبة اللي بياخدوا البرنامج بالجامعة ..
يعني كطلاب الحاسوب فقط اللي معهم المساق هادا ...
اول درسين كانوا مقدمة , دخلت على الدرس الثالث عأول صورة فيها وقفت فيها , لانو المثال اللي كان موجود ما عارف وين بدي اضع الكتابة و لما عرفت من الكنسول ما طلع نفس اللي عندي ..
حتى لما بدي اعرف النتيجة مش عارف كيف ..
و بعدين قلت اشوف كم باقي من الدرس الثالث لقيت كمية كبيرة , و انا عن نفسي ان كان شغلة بسيطة ما فهمتها ما عندي اي استعداد لأكمل اي شئ بعدها ..

و لهيك وقفت لاني لاحظت الدورة هاي مش مناسبة لي , يعني بتنفع فقط مثل ما حكيت لأشخاص بيدرسوا المساق في الجامعة و بسسس ...

و لهيك انسحبت منها و بطلت اشوف عن شو بتحكي مع اني كنت داخل حامي بالأول ...


طبعاً شكراً كتير للمشرفين و على فكرة لو انا زيك كان حكيت نفسس الشئ لانو الشغلة بتقهر ههه.

يعطيك العافية ::)

[القيصر]

احيانا بكون الوقت عامل مهم وما بسعف الواحد
امرار الواحد بكون متحمس لفكرة وبجأة بتيجي عليه شغله أو شي بنشغل فراح يهمل هل الشغله الي كان متحمس فيها
واذا كان متحمس الها درجة اكبيرة راح يرجع يتحمس للموضوع بعد ما يفضه من الشي الي شغلو

[الضحكة البريئة]

بصراحة انا ما طلبت اي دورات وما بعرف بهيك شي
والله هل ناس اكالين نكارين بعين الله يا محمد روق

[فلسطينية من ارض الوطن]

انا بصراحة ما بعرفحالي اذا سجلت والا لا بس بزكر انه ما سجلت ولو سجلت كان تابعت معكم
والله كلامك صحيح وما فيه زعل لانه بجد بتتعبوا وما بتلاقوا الي بهتم
يعطيك العافية محمد

[7ala alward]

امممم

بسيطه

كلن وعذره

[الأسمر]

معلش يامدير

بسيطة امسحها في هالدقن

حقك علي جميع الاعضاء

كانو متحمسين للفكرة بس التشجيع طار مع الهوا

انت الخير والبركة وما بدنياك تعصب

معك حق بكل كلمة وانت تتعب حالك كتير كتير عالفاضي

بس طالب منك شغلة , مليت من الاستايل هادا شفلك غيره اذا بدك اصمملك واحد من عيوني بس كيف بدك اياه

اذا في عندك واحد يكون اقرب للون الازرق السماواي الفاتح مع الازرق اللبني بطلع روعة

تحياتي لك ويعطيك العافية

[ألحان الحرية]

معك حق يامحمد في كل شي ..

أنا اشتركت في دورة الفيجوال بيسك ونزلت البرنامج واشتغلت عليه

وكنت حتى مسبقة كتير بالدروس قبل ماتبدى الدورة ..

بس فرمتت الجهاز وانحذف البرنامج وتنزيله هلأ صعب الكهرباء بتقطع دايما والتحميل بطيئ ..

بالاضافة الى انو تقيل على الجهاز وبيعلق كتير منه ..

لهيك ماكملت الدورة ..


وأنا مع هاد الرأي ..


من باب الحفاظ على عمل متكامل فيك تكمل الدورة وتخليها إكيد فايدتها ما بتنحصر بكم الردود

الي عليها لأنها حتبقى على طول مدى فاعلية الروابط أو الصور الخاصة بالشرح

[وردة اللوتس]

بعين الله و ما تعصب كتير لانو ما فى حدا بينفعك
و احنا عارفين انك تعبت كتير و شاكرينك على جهودك كتييييييييييييييييييييييييييييييييييييييييير يا عسل

[عاشقة الشموع]

بجد مغلبينك معنا
يعطيك العافية
يسلمووووووو

[hosamy]

اول شي يعطيك الف عافية يا أخي محمد ...

بصراحة انت عصبي كتير كتير !


تاني شي بحب اوضح نقطة انو الدورات ما بتنحصر بوقت محدد لأنو متلا انا بشتغل على الفوتوشوب والفيجوال بيسك كمان

وبعرف انو اي انجاز بده وقت .....!

يعني احنا بدنا الاعضاء يعملوا انجازات بوقت معين مش رح يزبط ...!

لانو الجديد على الفوتوشوب رح يتغلب كتير لانو مو سهل بالنسبالهم

وبالنسبة للفيجوال بيسك محمد اسعد صديقي واي شي مش رح يقصر بس انتو تعالولي ههههههههه

كمان انا من وجهة نظري تكملوا هالدورة اكيد اكيد في ناس رح تستفيد .....حتى لو واحد.....



بالنهاية بحكيلك يااأخي محمد ..مدير المنتدى... يعطيك الف عافية بس روق اعصابك وخليك ريلاكس


تحياتي الك ياعسل

[محمد2050]

عارف انه ردي اجا متأخر كتير مش شوية ،
بس هالفترة اللي فاتت كتير كنت مشغول ..

ما علينا ، المهم ..

بالنسبة للي حكو انه عندهم مشاكل بالبرنامج او التطبيق صعب فهاي مش حجة
لانه راموستا كان يساعد الكل وما كان يطنش اي استفسار
ومن الاساس كان شرحه واضح
ولو بدنا نغض النظر عن كل هالحجات ، كان بامكانكم تعتذروا عن المتابعة بطريقة او بأخرى

بس العيب منكم ..

وع كل الاحوال ، هي دورة جديدة بدت من فترة بسيطة
وانا ما كنت بدي دورات ، بس علشان خاطر راموستا ..
وبدي اشوف شو حتعملو ..

تحياتي للجميع ..